Abril campesín
Cada 17 d'abril campesines y campesinos de tol mundu celebramos la llucha pola tierra, la defensa del territoriu y los derechos de les persones que producimos los nuestros alimentos en tol planeta. Y facémoslo en recuerdu d'otru 17 d'abril, el de 1996. Aquel día policíes militares brasileños abrieron fueu contra una marcha del Movimientu de los Sin Tierra de Brasil, en Eldorado dos Carajás, nel estáu de Pará. Diecinueve persones fueron asesinaes. El so crimen: lluchar pol derechu a la tierra.La despoblación del mundu rural ye una realidá evidente. Cada vez hai menos campesines y campesinos, l'agricultura funciona como una industria más nel mercáu mundial, los alimentos recorren miles de kilómetros pa llegar a les nuestres meses. Dedíquense menos tierres a cultivar alimentos sanos y más a producir mercancíes barates, comida basura.
Les polítiques agraries y los Trataos de Llibre Comerciu -como'l TTIP o'l CETA- son una amenaza p'acabar colo poco que queda de les economíes locales, y cola soberanía de los pueblos. Les semientes tán suxetes a lleis de propiedá intelectual, y los procesos de mercantilización de la naturaleza convierten los alimentos n'activos financieros y, por tanto, receptores d'inversiones importantes, comercializables nel mercáu capitalista y suxetos a especulación.
Les campesines, que producimos la mayor parte de los alimentos que sostienen la nuestra vida, vemos cada vez más vulneraos los nuestros derechos básicos. Esta situación ta estrechamente relacionada con violaciones continuaes de los derechos humanos: expropiación de tierres y en dellos casos pola fuerza, discriminación y violencies machistes, dificultá d'accesu a la tierra, ingresos baxos y falta d'accesu a los medios de producción, protección social insuficiente y criminalización de los movimientos que defienden los derechos de les campesines y de les persones que trabayen nes zones rurales en tol mundu, como pasó en Gaza esti 30 de marzu, na celebración del Día de la Tierra. L'exércitu israelí acribilló a diecinueve persones indefenses y ferió a más de dos mil.
Asturies ye un casu d'esi procesu de destrucción al que se ve sometíu'l nuestru campu, como consecuencia d'unes polítiques agraries dictaes en despachos zarraos a miles de kilómetros. Les campesines asturianes desapaecen o sobreviven a base de grandes esfuerzos, l'aire del centru del nuestru país ye irrespirable, los pueblos destrúyense por abandonu, les quemes esfarrapen el territoriu, esmantélense les comunicaciones y tresportes públicos que xunten les zones rurales, en tanto que s'invierte n'autovíes y obres faraóniques qu'aíslen los pueblos. Multinacionales, como la canadiense Orvana Minerals (Orovalle), algamen concesiones nueves p'afuracar la tierra a la busca d'oru…
La Soberanía Alimentaria ye la única respuesta
La respuesta de les organizaciones campesines de tol mundu, xuntes na Vía Campesina, ye la llucha pola soberanía alimentaria, ye dicir, pol derechu de los pueblos a decidir cómo producir y distribuir los sos alimentos propios, garantizando l'alimentación sana y segura de toles persones. Esti derechu sostiénse nel trabayu de los campesinos y campesines, de les productores pequeñes y medianes, de les pescadores, de les pastores, de les indíxenes que son quien mantienen la producción d'alimentos basándose nos conocimientos tradicionales y na conservación de la biodiversidá.
Como en toles lluches, les muyeres son centrales tamién nesta. La soberanía alimentaria ye feminista porque tamos faciéndola posible la resistencia cotidiana de les muyeres que cuidamos los nuestros cuerpos y los nuestros territorios. Y por embargu, nun podemos ser les úniques responsables. Muyeres y homes tenemos qu'ocupanos de forma corresponsable de l'alimentación y de tolos trabayos asociaos al mantenimientu de la vida.
Pero son munchos los problemes a los que nos enfrentamos nesa llucha cotidiana: la falta de medios pa desenvolver el nuestru trabayu; los precios baxos de los productos agrícoles; la desvalorización de la vida nel campu; la falta de polítiques y incentivos qu'apoyen l'agricultura campesina, local y artesanal; la esistencia de lexislaciones adaptaes a la gran producción…
Por eso, p'avanzar hacia la Soberanía Alimentaria fáese fundamental l'apoyu decidíu a la producción agroecolóxica local. N'Asturies lleva años confirmándose una rede de productores pequeñes, dedicaes a l'agricultura y a la ganadería ecolóxiques, que, a pesar de les dificultaes crecientes, lluchamos por mantener unes formes de producción y de vida que nos permitan continuar nel campu, y siguir cultivando y cuidando los nuestros alimentos. Pero, pa que'l nuestru esfuerzu tenga resultaos, ye necesaria la implicación del restu de la sociedá al traviés del consumu responsable. Esto ye, consumir alimentos sanos, de cercanía y de variedaes autóctones. Alimentos compraos nos mercaos locales y nes tiendes de los nuestros barrios, producíos por campesinos y campesines que vivimos nel territoriu, que cuidamos de la nuestra contorna y, amás, mantenemos el mundu rural vivu, guardando les tradiciones culturales y los saberes populares. El consumu responsable tamién implica l'apoyu de la sociedá a les nuestres reivindicaciones y lluches, en definitiva, son les de toes.
Dende la Campaña Asturiana pola Soberanía Alimentaria sumámonos, un añu más, al llamamientu mundial de la Vía Campesina pa conmemorar el Día Internacional de les Lluches Campesines, y siguir trabayando pa reforzar la soberanía alimentaria, la llucha contra'l cambiu climáticu y la conservación de la biodiversidá. Y facemos nuestres les sos reivindicaciones.
¡Alimentamos los nuestros pueblos y construimos movimientu pa cambiar el mundu!
¡Contra'l saquéu del capital y l'imperiu, pola tierra y la soberanía de los nuestros pueblos!
17 d'abril, Día Internacional de les Lluches
Campesines
Campaña Asturiana pola Soberanía Alimentaria
Campaña Asturiana pola Soberanía Alimentaria